10 Tallaabo oo ku saabsan ka faa iidaysiga technology iyo waqtiga, kuuna sahlaya inaad soo saarto dakhli.

Hordhac

Isbedbedelka noloshu wa mid ku salaysan dhinacyo badan, ku waas oo ay kamid tahay helista dhaqaale joogto ah, hakugu soo galo inaad waqtigaaga iibsato (shaqaale noqotid) ama in laguu shaqeeyo. Mawduucan waxan kugula wadaagayaa 10 talaabo ama qodob oo aan u arko in ay muhiim u tahay sidii aad ku samayn lahayd dhaqaale joogto ah, adigoo ku salaynaya ka faa iidaysiga technology iyo waqtiga aad haysato.

1. Cadaynta wax naftu jeceshahay

Qaarbadan oo inaga mid ah waxa macquul ah in ay ka shaqeeyaan shaqooyin aysan ku faraxsanayn, amaba aysan haynin wax shaqo ah, hadaba inaad is waydiiso maxaad xiiseysaa, maxaadse ku fiicantahay waa su’aalaha kuu sahlaya inaad sifudud ku garato, shayga naftaadu aysan dhibsanayn ka shaqayntiisa. Marka aad ogaato wax aad jeceshahay ama xiiseyso waxaad ka gudubtay caqabad aad u wayn, taas oo dhalinyaro badan ku ah gidaar aysan ka gudbi karin maanta.

2. Tababarka iyo dhisidda aqoontaada.

Markaad ogaatay waxaad ku fiicantahay, waxaa lagama maarmaan ah in aad raadiso xirfadaha la xiriira shaygaas, si aad naftaada ugu tababarto wixii ka dhiman ee ku saabsan shaygaas. Casrigan maanta waxaad awooddaa inaad xirfad kasta ku barato gurigaaga si bilaash ah ama aad lacag bixiso. Meelaaha kala duduwan ee maanta aad sifudud wax uga barankarto waxaa kamida sida Coursera, Udemy, Youtube iwm.

3. Dhisidda Personal Brand.

Marka laga hadlayo joogista iyo ka muuqashada baraha bulshada waa in aad samaysataa wax la dhaho Personal Brand kaas oo ah magac tilmaan lagugu garto. Taasi waxay kuu sahlaysaa in aad sifudud ugu gaadho fursado badan oo kaa maqna. Qaababka aad ku samaysankarto Personal Brand iyo xog dhamaystiran waxaan kasoo sameen doonnaa muuqaal ama maqaal insha Allaah.

4. Raadinta fursadaha freelancing-ka.

Markad ogaatay xirfadda aad jeceshahay isla markaana aad la timi aqoonteeda, waxaad awood u leedahay in aad kusoo bandhigto suuqyada freelancing-ka, adigoo markaas awood u yeelan doona in aad iibgeyso xirfaddii aad baratay. Tani waxay kuu fududaysaa in aad ka samayso dakhli joogta ah, sidoo kale shayga aad qabanaysana uu noqdo mid ku farxad geliya, oo aadan marnaba dhibsanayn qabashadiisa.

5. Samaynta Digital products.

Waxyaabaha maanta aduunka la isku dhaafay waa adeegyada dhinaca digitalka ah sida e-books, online courses, web ama software applications iyo wixii kale ee la xiriira. Web ama app aad samayso oo qabanaya shaqo markaas dadku ubaahanyihiin, waxaa macquul ah in aad ka samayso dakhli aad u badan, isla markaana aysan kaaga baahan waqti badan inaad geliso, adigoo maqan ama noloshaada kale watana aad ka hesho dakhli joogto ah.

6. Lacag ka samaynta figradaahaga/hal-abuurnimadaada.

Hadii aad xiisaynayso inaad muuqaal ama maqaal ka samayso figradahaaga iyo hal-abuurnimada iyo hibada ilaahay ku siiyay, waxaad u adeegsankartaa inaad lacag ka samayso sida YouTube ad revenue, sponsored content, affiliate marketing iyo kuwa la midka ah. Qaarbadan oo dhalinyara maanta ka mid ah qodobkan way adeegsandaan waxayna lacag uga sameeyaan goobaha sida facebook, youtube iyo tiktok. Hadii aad doonayso inaad ogaato qaabka facebook lacag looga sameeyo, waa kuu muhiim inaad akhrido mowduucan: “Qaabka ugu fudud ee lacag looga sameeyo facebook 2024.”

7. Samaysashada Dukaan online ah.

Waxyaabaha ganacsiga dukaamada isdhaafiyay waxa kamida samaysashada waxa loo yaqaan E-commerce, taas oo aadan ku qasbanayn in aad tusaale ahaan dukaan furato oo bixiso kiro iyo dab. Taas bedelkeeda hadii aad jeceshahay inaad iibiso badeecado kala duwan, waxaad samaysankartaa dukaan online ah, qofka u bahan badeecadana uu halkaas kasoo dalbankaro, kadibna aad sifudud ugu dirikarto markaad hesho lacagta. Hadii aad u baahantahay samaysashada dukaan online ah waad nala soo xiriirikartaa waxaadna ku helaysaa qiimo runtii aad ku qanacdo.

8. Maalgashiga Cryptocurrency iyo Stocks.

Cryptocurrency iyo Stock waa qaar kamida meelaha laga sameeyo dhaqaale fiican oo noloshaada wax kabedela, lakin waxa qasaba ah in aad marka hore haysato lacag aad ku maalgashato oo jeebkaaga waa in marka hore wax ku jiraan. Cryptocurrency waxay iyadu kaga sii duwantahay Stock waxa jira qaabab crypto kamida oo aad kaga samaynakarto lacag, iyadoo aysan kaa baxayn 1$ lakin taas bedelkeeda waxay kaa rabtaa aqoonteeda iyo xirfadeeda inaad la timaado. Hadaad rabto inaad ogaato qaabka crypto looga shaqaysto iyo xogteeda waa kuu muhiim inaad soo booqato mowduucan: “Waa maxay maalgelinta crypto ? 4 qaab oo lacag looga sameeyo suuqa crypto”

9. Wadashaqaynta dadka iyo samaysashada network.

Isku day inaad ka qaybqaadato kulamada iyo tababarada laysugu yimaado, sidoo kale hadad awoodayso ka qaybqaadato waxyaabaha loo yaqaan hackathons-ka. Taas waxay ku siinaysaa fursad aad ku barato dad cusub oo leh ama ku shaqeeya xirfadaada, ka faa’iido cilmi kaa maqan, ku barato dad aad wada shaqaysaan iwm

10. Ka war haynta technology socda.

Isbedbedelka technology-gu waa mid ku socda xawaare saa’id ah, waana muhiim in aad ka warhayso markasta wax kucusub ama trending-ka ah. Tusaale hada waxa aduunka meelo badan qabsaday waxa ladhaho AI, wuxuu soo saaray xirfadlayaal iyo ganacsadeyaal cusub, sidookale wuxuu horumarin balaadhan ku sameeya qaybo badan oo kamida noloshii caadiga ahayd sida dhinacyada caafimaadka, warshada, isusocodka iyo qaarbadanoo kale. Waa muhiim in aad mar walba tahay, qof la socda ama ka war haya technology-ga socda iyo meesha lagu haminayo in loo guuro

Dhamaad

Waxaa hubaal ah waqtiga lagu jiro in dad badan ay ka faa’iidaysanayaan technology-ga socda iyo waqtigooda, halka qaar badan oo inaga mid ahina aysan ku baraarugsanayn fursadaha qaaliga ah ee ay haystaan. Hadii aad hayso maanta shaqo aadan ku qanacsanayn, ama aad tahay qof aan shaqo gacanta ku hayn, ama haysta shaqo aad ka shaqayso 8 saacadood, waxaad samaysaa in aad is waydiiso su’aalo kooban, naftaadana la sheekaysato. Mawduucan waa bilow waana aas’aas, ujeedaduna waa in uu noqdo mid kugu haga wadada saxda ah. Ogow waxkasta oo la rabo in laqabto waxay rabaan ficil, waxay leeyihiin bar bilow iyo bar dhamaad. Waxaan idinkula dardaarmayaa inaad ka faa’iidaysataan waqtigiina iyo technology-ga maanta jira, mahadsanidiin.